പഴയ ഇനം നല്ല ഒന്നാന്തരം തേക്കുകൊണ്ട് അപ്പാപ്പന് പറഞ്ഞ അതേ ക്രമത്തില് ആശാരിയെക്കൊണ്ട് നിറുത്തിപണിയിപ്പിച്ച ഒരു കട്ടില്, അങ്ങിങ്ങായി വലിയ കുഴിവുള്ള പകുതിയും നനഞ്ഞിരിക്കുന്ന ഒരു പഞ്ഞി മെത്ത, കട്ടിലിനു താഴെ നൂറ് കൂട്ടം എട്ടുകാലികള് പായസം വെച്ചിരുന്ന പോലെ ഒരു വലിയ ഓട്ടുരുളി, ജിജിമോളുടെ മാമ്മോദീസായ്ക്ക് അന്നമ്മ ദുബായില് നിന്ന് കൊണ്ട് വന്ന നീലനിറത്തില് വലിയ വട്ടങ്ങളുള്ള അരിക് അടര്ന്നു പോയ ഒരു കമ്പിളി, നാല്പ്പത്തൊന്പതു മണികള് അവശേഷിക്കുന്ന അഴുക്കുപുരണ്ട കൊന്തയോട് കൂട്ടിക്കെട്ടി പിഞ്ഞിപ്പോയ ഒരു വെന്തിങ്ങ, അമേരിക്കയില് നിന്ന് ഇച്ചാച്ചന് കൊണ്ടു വന്ന നൂലെല്ലാം പൊന്തിയ തവിട്ട് നിറത്തിലുള്ള ഒരു ഫ്രന്റ് ഓപ്പണ് സ്വെറ്റര്, അപ്പാപ്പന്റെ ചില്ല് ഫോട്ടോ വെച്ച ഒരു ചെറിയ മേശ, അതിനു മുന്പില് കത്തിത്തീര്ന്നെന്ന് സമാധാനിപ്പിക്കുന്ന കരിഞ്ഞ ഒരു മെഴുകുതിരി, ചെറിയ നോവേനപുസ്തകം, കാല് ഭാഗം അടര്ന്ന് പോയ ചെറിയ ചുവന്ന പൂക്കള് കുതിര്ന്നു പോയെന്ന് തോന്നിപ്പിക്കുന്ന പൊട്ടാത്ത ഒരു പ്ലേറ്റ്, ചെരിഞ്ഞ് വീണു പോകുന്ന ഒരു സ്റ്റീല് ഗ്ലാസ്സ്, ചതുരങ്ങള് മാത്രമവശേഷിക്കുന്ന ഒരു കണ്ണട, കരിമ്പനയടിച്ച രണ്ട് തോര്ത്തുമുണ്ട്, ചെറിയ ശരീരയളവിനു പാകത്തിനു വെട്ടി തയ്പ്പിച്ച മൂന്ന് നൈറ്റികള്, ഒരു വലിയ സേഫ്റ്റി പിന്, പെയിന്റ് പോയി തുരുമ്പെടുത്ത ഒരു ചെറിയ ബിസ്കറ്റ് ഡപ്പിക്കുള്ളില് നടുവേ മടക്ക് വീണ വേളാങ്കണി മാതാവിന്റെ ഒരു പടവും കുന്തിരിക്കത്തിന്റെ ഒരു ചെറിയ പ്ലാസ്റ്റിക്ക് പായ്ക്കറ്റും ഇരുപത്തിയൊന്ന് പലതരത്തിലുള്ള നാണയത്തുട്ടുകളൊടൊപ്പം ഒരു അഞ്ചിന്റേയും രണ്ട് പത്തിന്റേയും നോട്ടുകള്, പേരില്ലാത്ത ഒരു മരുന്ന് ചീട്ട്, അറ്റമെല്ലാം ദ്രവിച്ചുപോയ ഒരു ബൈബിളിന്റെയുള്ളില് ദീപിക ദിനപത്രത്തില് നിന്നു വെട്ടിവെച്ചിരിക്കുന്ന കുറേ പരിചയക്കാരുടേയും കുറേയധികം അജ്ഞാതരുടേയും ചരമ അറിയിപ്പുകളോടൊപ്പം ജിജിമോളുടെ കല്ല്യാണ ഫോട്ടോയും ഇച്ചാച്ചന്റെ മരിച്ചടക്കിനുള്ള അറിയിപ്പ് കുറിപ്പും,
അതോടൊപ്പം
മൂത്രത്തിന്റെ മണമുള്ള ഒരു മുറി, അനില നേഴ്സ് മാത്രം കയറിയിരുന്ന ഒരു വാതില്, കാറ്റെത്തെപ്പോഴോ അടഞ്ഞു പോയ രണ്ട് ജനല്.
Thursday, May 22, 2008
അമ്മാമ്മ മരിച്ചപ്പോള് കിട്ടിയത്
Thursday, May 15, 2008
നിസ്സഹായനായ ദൈവം
ദൈവമേ ഇനിയുമീ കള്ളക്കളികള് അവസാനിപ്പിച്ചുകൂടേ?
നിനക്ക് കഴിവില്ലയെന്ന് സമ്മതിച്ചുകൂടേ?
അറിയാതെ പറ്റുന്ന അബദ്ധങ്ങളില്
ലോകം നിന്നെ മാറോടണയ്ക്കുമ്പോള്
അരുതേയെന്ന് ഒരിക്കല് വിലക്കികൂടേ?
നിന്റെ കൈകളില് അന്നവര് തറച്ചയാണി പതിഞ്ഞിറങ്ങിയിരുന്നുവെന്നും
കുന്തത്താല് മുറിവേല്പ്പിച്ചപ്പോള് ഊര്ദ്ധ്വശ്വാസത്തില് നീ പിടഞ്ഞിരുന്നുവെന്നും
നിന്നെ ഉയിര്ത്തെഴുന്നേല്പ്പിക്കാമെന്ന് വാക്കരുളിയ പിതാവ്
ഹൃദയവേദനയാല് നിനക്ക് മുന്പേ മരിച്ചിരുന്നുവെന്നും
അത്യുച്ചത്തിലൊന്ന് നിലവിളിച്ചുകൂടേ?
പ്രളയമായും തീമഴയായും ഭൂമിപിളര്ന്നും
ഇറങ്ങിപ്പോയ നാവ് നിനക്കൊന്ന് ചലിപ്പിച്ചുകൂടേ?
അല്പമെങ്കിലും സത്യസന്ധത കാണിച്ചുകൂടേ?
നീ ദൈവമല്ലേ?
പ്രിയ മരണമേ
പ്രിയ മരണമേ
എത്രമാത്രം പ്രണയിച്ചതാണ് ഞാന്
നിന്നെ വരിക്കാന് എത്ര കാത്തിരുന്നതാണ്
വിരഹിച്ചിരുന്ന ദിവസങ്ങളില്
നിന്റെ തണുത്ത കരസ്പര്ശം കൊതിച്ച്
നിന്റെ ഇമ്പമാര്ന്ന നിശബ്ദതയില് ലയിച്ച്
എന്നിട്ട് നീയൊന്ന് എത്തി നോക്കിയത്
ഇപ്പോള്, എന്റെ കുഞ്ഞെന്റെയുള്ളില് ശ്വസിച്ചു തുടങ്ങിയപ്പോള്
എന്നിലേക്ക് ഒരു പിടി മണ്ണെടുത്തിടുമ്പോള്
എന്റെ കുഞ്ഞിനേയും എന്നോടൊപ്പം
ചേര്ക്കണം.
ആറടിയുടെ മൌനത്തില്
ഞാനവനെയൊന്ന് താലോലിച്ചോട്ടേ!
Tuesday, May 13, 2008
ബ്ലോഗ് ഇവന്റ് അനൌണ്സ്മെന്റ്! (സ്ത്രീ എഴുത്തുകാര്)
ഇംഗ്ലീഷ് ബ്ലോഗുകള് ഇവന്റുകള് കൊണ്ട് സമൃദ്ധമാണ്. മലയാളം ബ്ലോഗിലാകട്ടെ പേരിനു പോലും അങ്ങിനെയൊരു പരിപാടിയില്ല. അതുകൊണ്ട് ഒരു ഇവന്റ് തുടങ്ങാമെന്നു വെച്ചു.
താത്പര്യമുള്ളവര് പങ്കെടുക്കുക.
പരിപാടി ഇതാണ് : മലയാളത്തിലും ഇതര ഭാഷകളിലും ലോകസാഹിത്യത്തിലും, നിങ്ങള് വായിച്ചിട്ടുള്ള ഏതെങ്കിലും സ്ത്രീ എഴുത്തുകാരെക്കുറിച്ചു ഒരു ലേഖനമോ, കുറിപ്പോ, ഇന്റര്വ്യൂവോ, പോഡ്കാസ്റ്റോ, വരച്ച ഒരു പെന്സില് സ്കെച്ചോ അങ്ങിനെ എന്തെങ്കിലും അവരെക്കുറിച്ചുള്ളത് അടുത്ത മാസം ജൂണ് 13നു ഉള്ളില് സ്വന്തം ബ്ലോഗില് ഇടുക. എന്നിട്ട് അതിന്റെ ലിങ്ക് ഇവിടെ കമന്റോ, അല്ലെങ്കില് എനിക്ക് ഈമെയിലോ ആയി അയച്ചു തരിക. അത്രമാത്രം. കിട്ടുന്ന ലിങ്കുകളെല്ലാം സ്വരൂപിച്ച് വനിതാലോകത്തില് ഒരു ഫൈനല് പോസ്റ്റോട് കൂടി ഇടുന്നതായിരിക്കും.
ശ്രദ്ധിക്കേണ്ട പ്രധാന കാര്യങ്ങള്:
1. മാധവിക്കുട്ടി മുതല് J.K Rowling വരെ ആരുമാകാം. സ്ത്രീയെഴുത്തുകാര് ആയിരിക്കണം എന്നു മാത്രം നിബന്ധന. ഭാഷ നിര്ബന്ധമല്ല.
2. ഇന്നു മുതല് ജൂണ് 13നുള്ളില് പോസ്റ്റിടണം.
3. പ്രസിദ്ധരായിരിക്കണമെന്നോ എല്ലാവര്ക്കും അറിഞ്ഞിരിക്കണമെന്നോ ഒന്നുമില്ല. ആരായാലും നിങ്ങള്ക്ക് എന്തുകൊണ്ട് ഇഷ്ടപ്പെട്ടു/ഇഷ്ടപ്പെട്ടില്ല എന്നാണ്. ബ്ലോഗിലെ എഴുത്തുകാര് ആയിരിക്കരുതെന്ന് മാത്രം :)
4. എഴുതാന് സാധിക്കാത്തവര്ക്ക് പോഡ് കാസ്റ്റോ, അല്ലെങ്കില് ആ എഴുത്തുകാരിയുടെ ചിത്രമോ, അവരെക്കുറിച്ച് ഒരു കവിതയോ അങ്ങിനെ എന്തായാലും സ്വീകരിക്കും.
5. എഴുത്തിനെക്കുറിച്ചുള്ള ലേഖനമോ അവലോകനമോ ആവണമെന്ന് ഒരു നിര്ബന്ധവുമില്ല. ആ പുസ്തകത്തിനെക്കുറിച്ചുള്ള നിങ്ങളുടെ ഓര്മ്മക്കുറിപ്പോ, അല്ലെങ്കില് അത് നിങ്ങളുടെ ജീവിതത്തെ എങ്ങിനെ മാറ്റിമറിച്ചു, എന്തുകൊണ്ട് അവരെ ഓര്ത്തിരിക്കുന്നു എന്നുള്ള കുറിപ്പുകളും സ്വീകരിക്കും.
6. ഇപ്പോള് ബ്ലോഗില്ലാത്തവര്ക്കും പങ്കെടുക്കാം. ഈമെയിലില് അയച്ചു തന്നാല് മതി. പഴ്യ/പുത്യ/മധ്യ അങ്ങിനെ പ്രായഭേദമന്യേ പങ്കെടുക്കാം.
7. പോസ്റ്റുകള് അവനവന്റെ ബ്ലോഗിലാണ് ഇടേണ്ടത്. പോസ്റ്റിട്ട ശേഷം ഈ ബ്ലോഗ് പോസ്റ്റില് വന്ന് ഒരു കമന്റിലൂടെയോ അല്ലെങ്കില് ഒരു ഈമെയിലായോ പോസ്റ്റിട്ടിട്ടുണ്ടെന്നും അതിന്റെ ലിങ്കും തരണം. അല്ലെങ്കില് പോസ്റ്റുകള് തേടി കണ്ടു പിടിക്കാന് ബുദ്ധിമുട്ടാണ്.
8. ഒരാള് ഒരു എഴുത്തുകാരിയെക്കുറിച്ച് എഴുതിയെങ്കില് അത് മറ്റൊരാള്ക്കും എഴുതാം. തീര്ന്നു പോകുന്ന സംഗതി അല്ലല്ലോ. ആരെങ്കിലും കമന്റുകളില് ഇന്നയാളെക്കുറിച്ച് എഴുതും എന്ന് ആരെങ്കിലും സൂചിപ്പിച്ചാല് മറ്റൊരാളെ തേടുകയും ആവാം. പക്ഷെ നിര്ബന്ധമില്ല. ഒരു എഴുത്തുകാരിയെക്കുറിച്ച് ഒന്നില് കൂടുതല് ആളുകള്ക്കും എഴുതാം. നിങ്ങളുടെ വീക്ഷണമാണ് മുഖ്യം.
9. നിങ്ങളിതു വരെ വായിച്ചിട്ടില്ലാത്ത ഒരു പുതിയ എഴുത്തുകാരിയെക്കുറിച്ച് വായിച്ചിട്ട് അവരെ പരിചയപ്പെടുത്തിയാലും മതി. വിക്കിയില് നിന്നോ ഗൂഗിളില് നിന്നോ റിസോര്സസ് തേടാമല്ലോ. പുസ്തകം വായിച്ചിരിക്കണം. (കൊസ്റ്റ്യന് ചോദിക്കും) :)
10. മുഖ്യമായും ഫിക്ഷന് എഴുതുന്നവരെ മാത്രമേ സ്വീകരിക്കൂ. (അവര് മറ്റെന്തെങ്കിലും എഴുതിയിട്ടുണ്ടാവരുത് എന്നല്ല, മറിച്ച് പ്രധാന എഴുത്ത് ഫിക്ഷന് ആയിരുന്നിരിക്കണം. ഉദാ: അരുന്ധതി റായ്. അവര് ഇപ്പോള് ലേഖനങ്ങളും മറ്റും എഴുതുന്നുണ്ടെങ്കിലും അവരുടെ പ്രധാന എഴുത്ത് ഗോഡ് ഓഫ് സ്മോള് തിംഗ്സ് ആയിരുന്നല്ലോ).
സമ്മാനങ്ങളൊന്നുമില്ല. ജഡ്ജസ് ഇല്ല. മത്സരമില്ല. നിങ്ങള്ക്ക് കിട്ടുന്ന ആത്മസംതൃപ്തി മാത്രം :)
വേഗമാവട്ടെ, ലൈബ്രറിയില് ചെല്ലൂ, ഇനിയും വായിക്കാത്തവരെ വായിക്കൂ, എഴുതൂ, പങ്കെടുക്കൂ.
Sunday, May 11, 2008
ക്ലീഷേ
1. ജീവൻ
2. ഉമ്മ
3. അമ്മ
5. ponnumma
6. Amma= Bhoomi :)
Vast as the earth..silent and patient..with its uncountably valuable resources, feeding her children incessantly, without complains.. :)...
7. അമ്മച്ചി ....
അമ്മച്ചിയെ ....
അമ്മച്ചീ.....
എഴുതിയാല് മുഴുവനായങ്ങോട് ഭാവം വരില്ല ...
ഓരോ സാഹചര്യതിനനുസരിച്ചു ഞാന് ഉപയോഗിക്കുന്ന ട്യൂണ് .. അതാണ് കൂടുതല് പ്രധാനം
8. സ്നേഹലാളനം
9. സ്നേഹം
10. അമ്മയും നന്മയുമൊന്നാണ്
ഞങ്ങളും നിങ്ങളുമൊന്നാണ്...
അറ്റമില്ലാത്തൊരീ ജീവിതത്തില്
നമ്മളൊറ്റയല്ലൊറ്റയല്ലൊറ്റയല്ല...
- എന്നു പാടിയിട്ടുണ്ട് ഞങ്ങള് പണ്ട്
എന്റെ കുടത്തില് നിറയാന്
പുഴക്കൊരു പുഞ്ചിരി മാത്രം മതി
- എന്നെഴുതിയിട്ടുണ്ട് പി രാമന് ‘അമ്മ’ എന്ന പേരില് ഒരു കവിത.
11. “....ന്റുമ്മോ...!!”
12. അമ്മ.:)
13. "amma"
14. അക്ഷരങ്ങളില്ലാത്ത ഒരു വാക്കാണത്, എങ്ങനെ പറയും?
15. കണ്ണാടി
16. sneha sandhra...sneha mayi??snehathinte uravidam...(korachukoodi samayam tharamo)??
17. ഒരു വാക്കില് പറയാന് അല്പം ബുദ്ധിമുട്ടാ.. ഒരു വാക്കല്ല..നൂറ് വാക്ക് വേണേല് പറയാം..
18. certain things aught to be left undescribed...ha ha..cant find a word. can u?
19. warm smile
20. വിധേയ
21. പ്രവചനാതീതം. (Unpredictable)
[I thought long and hard before coming up with this. I asked my wife to tell about a single word about her mom. Our thoughts were very close; credit goes to her for this exact word. Yes, she wasn’t talking about my mom]
22. തള്ള ! :)
23. utharam muttikkunna chodyam injee.
essay question ingane oneword aakkunnath sariyo?
24. :)
25. സഹനം
26. ഞാന് അമ്മയെ ഓര്ക്കുമ്പോള് പുകയുടെ നനുത്ത ഗന്ധമാണ് ഓര്മ്മ വരിക. അമ്മയുടെ മടിയില് കിടക്കുമ്പോള് എപ്പോഴും അമ്മയ്ക്ക് പുകയുടെ മണമാണ്.
27. koottukariyaya amma....
------------
അമ്മയെക്കുറിച്ച് എന്താ ഒരൊറ്റ വാക്കെന്ന് ചോദിച്ചപ്പോള് കിട്ടിയ ചില മറുപടികളാണ്. CNN-ല് ഇതുപോലെ പലരും അമ്മയെ ഒറ്റവാക്കില് പറയുന്നതു കണ്ടപ്പോള് ഞാനും പലരോടും ചോദിച്ചു നോക്കിയതാണ്.
ഒരുപാട് പേര് സ്നേഹം എന്നാണ് പറഞ്ഞത്. മറ്റു ചിലര് അമ്മ എന്ന് മാത്രവും. ഇതിലെല്ലാം പെടാത്ത ഒരു വാക്കുണ്ടോ അമ്മയെക്കുറിച്ച് പറയാന് എന്ന് നോക്കിയതാണ്. ഓരോ പദവും എന്നാല് പദങ്ങളൊന്നും തികയാത്തതും ഈ ഒരൊറ്റ ആളേയുള്ളൂ എന്ന് തോന്നുന്നതെന്തുകൊണ്ടാണാവോ?
ഓരോ സ്ത്രീയും ഓരോ പുരുഷനും ചില നിമിഷങ്ങളില് ചില നേരങ്ങളില് അമ്മയാവുന്നുണ്ടാവും.
Thursday, May 08, 2008
നിശ്ചലം
എനിക്കു ചുറ്റും
കാറ്റ് ശബ്ദമുയര്ത്തി അരുവിയില് നീരാടുന്നുണ്ട്
കുരുവികള് ചില്ലകള് അലങ്കരിക്കുന്നുണ്ട്
വെളിച്ചം ഒളിസങ്കേതങ്ങള് അന്വേഷിക്കുന്നുണ്ട്
ചിതലുകള് പുതുമയും
ഞാന്
കാണുന്നുണ്ട്, പക്ഷെ നനയുന്നില്ല
കേള്ക്കുന്നുണ്ട് നീറുന്നില്ല
അറിയുന്നുണ്ട് രുചിക്കുന്നില്ല
ഇടയില് എപ്പോഴോ രണ്ട് ശ്വാസങ്ങള്ക്ക് നടുവില്
ഞാന് നിശ്ചലമായിപ്പോയിരുന്നിരിക്കണം.
